Pune : सात देशांचा एकत्रित युद्धसराव पुण्यात होणार !
एमपीसी न्यूज- परदेशातील सैन्यांसोबत सौहार्दपूर्ण वातावरण राहावे तसेच उपनगरी भागातील दहशतवादाला आळा घालण्याचे उद्दिष्ट डोळ्यांसमोर ठेवून भारतीय लष्करातील सदर्न कमांड हे भूतान, श्रीलंका, बाग्लांदेश, थायलंड, नेपाळ या देशाच्या सैन्यदलांसोबत लष्करी सराव करणार आहे. 10 ते 16 सप्टेंबरदरम्यान पुण्याजवळील औंधमध्ये हा लष्करी सराव होणार आहे. अशी माहिती सदर्न कमांड प्रमुख डी.आर. सोनी यांनी पत्रकार परिषदेत दिली.
लेफ्टनंट जनरल सोनी म्हणाले, “‘बे ऑफ बंगाल इनिशिएटिव्ह फॉर मल्टिसेक्टरल अॅण्ड इकॉनॉमिकल कॉर्पोरेशन’ (बिमस्टेक) संघटनेमध्ये भारत, बांग्लादेश, नेपाळ, भूतान, श्रीलंका, थायलंड आणि म्यानमार या देशांचा समावेश होतो. ‘बिमस्टेक’ देशांमध्ये जगाच्या लोकसंख्येपैकी 22 टक्के लोकसंख्येचे वास्तव्य आहे. दहशतवादाचा बीमोड करणे हे या सर्व देशांपुढील समान उद्दिष्ट आहे.
या युद्धसरावादरम्यान 15 सप्टेंबर रोजी सातही देशांच्या लष्कर प्रमुखांच्या एकत्रित परिषदेचे आयोजन करण्यात आले असून भारताचे लष्कर प्रमुख बिपीन रावत या परिषदेला मार्गदर्शन करणार आहेत. संरक्षण राज्यमंत्री सुभाष भामरे यांच्या उपस्थितीत या युद्ध सरावाचा समारोप होणार आहे. सहभागी देशांचे प्रत्येकी पाच लष्करी अधिकारी आणि पंचवीस ज्युनिअर कमिशन अधिकारी या युद्ध सरावामध्ये सहभागी होणार आहेत. भारताचे माजी राजदूत जी. पार्थसारथी संयुक्त युद्ध सरावाचे निरीक्षक म्हणून काम करणार आहेत. याआधी अशा पध्दतीचा लष्करी सराव बांग्लादेश, भूतान, म्यानमार येथे झाला होता.
No comments:
Post a Comment