Pune : गणेशोत्सवासाठी शहरात सात हजार पोलिसांचा बंदोबस्त
एमपीसी न्यूज- राज्याची सांस्कृतिक राजधानी म्हणून पुण्याची ओळख असणारा गणेश उत्सव निर्विघ्नपणे पार पडावा यासाठी पुणे शहरात तब्बल 7 हजार पोलिसांचा बंदोबस्त तैनात करण्यात येणार आहे. गणेश प्राणप्रतिष्ठापना पासून ते गणेश विसर्जनापर्यंत पोलिसांचा हा बंदोबस्त अहोरात्र असणार आहे.
पुणे पोलीस दलात गेल्या दोन-तीन महिन्यात पोलीस निरीक्षक पासून वरिष्ठांपर्यंत सर्वांच्याच बदल्या होऊन बहुतांश अधिकारी नव्याने आले आहेत. त्यामुळे यंदाच्या गणेशोत्सवाच्या तयारीसाठी गेल्या महिन्याभरापासून पोलिसांनी कंबर कसली असून मांडव कमाने टाकण्यापासून ते ढोल ताशा पथक , मंडळांचे पदाधिकारी यांच्यासोबत बैठका सुरू आहेत. मंडळांना परवाना मिळण्यासाठी ऑनलाइन सुविधा देखील सुरू केली आहे.
उद्यापासून गणेश उत्सव सुरू होत असल्याने पोलिस आयुक्त के व्यंकटेशम, सहपोलीस आयुक्त शिवाजी बोडखे ,यांच्या मार्गदर्शनाखाली विशेष शाखेचे पोलीस उपायुक्त अशोक मोराळे यांनी बंदोबस्ताचे आखणी केली आहे. दोन अतिरिक्त पोलिस आयुक्त, 15 उपायुक्त, 36 सहाय्यक आयुक्त, दोनशे पोलीस निरीक्षक, 525 सहाय्यक निरीक्षक, उपनिरीक्षक आणि सहा हजार कर्मचारी असा ताफा बंदोबस्तासाठी तैनात करण्यात येणार आहे. गृहरक्षक दलाचे पाचशे जवान राज्य राखीव पोलीस दलाच्या दोन तुकड्या बंदोबस्तासाठी तैनात असणार आहेत.
बेलबाग चौक, मंडई, शनिपार ,बाजीराव रस्ता, शनिवार वाडा, अप्पा बळवंत चौक, लक्ष्मी रस्ता याठिकाणी भाविकांची मोठी गर्दी असते त्यामध्ये पाकीटमार, साखळीचोर, मोबाईल चोरी मोठ्या प्रमाणात होण्याची शक्यता असल्याने, याचा प्रतिबंध करण्यासाठी साध्या वेशातील पोलीस पथक गस्त घालणार आहे. तरुणी आणि महिलांची छेडछाड होऊ नये यासाठी गुन्हे शाखेचे पथक आणि दामिनी पथक देखील तैनात असणार आहे.
No comments:
Post a Comment